Восень…. Рознакаляровыя фарбы. Апошнія прамяні сонца. Пах прэлага лісця. Бабіна лета. Ты разумееш, што хутка прыдуць халады, але яркасць і прыгажосць гэтай пары нараджаюць фантазію і творчасць.
6 лістапада ў рамках работы рэсурснага цэнтра гімназіі г. Дзяржынска «Школа выхавання праз мастацтва» прайшла творчая майстэрня «Размалюем восень!». У мерапрыемстве прымалі ўдзел прадстаўнікі ўстаноў адукацыі Дзяржынскага раёна: Томкавічскі ВПК-ЯС-БШ, Путчынскі ВПК-ДС-ПШ, гімназія г. Фаніпаля, СШ№2 г. Дзяржынска, СШ №1 г. Фаніпаля, Станькаўская СШ ім. Марата Казея, Скірмантаўскі ВПК-ДС-БШ, Валмянскі ВПК-ДС-БШ, Негарэльская СШ№1, Вялікасельская ВПК-ДС-БШ , Петкавічскі ВПК- ДС-СШ, Цэнтр творчасці дзяцей і моладзі Дзяржынскага раёна, гімназія г. Дзяржынска.
Дэманстрацыя настаўнікамі гімназіі розных нетрадыцыйных тэхнік выяўленчага мастацтва: набрызг, маляванне грэбнем, зубной шчоткай, васковымі крэйдамі, кляксаграфія трубачкай, эбру, фоттаж — падштурхнула прысутных да сумеснай практычнай дзейнасці. А маляванне на пене для галення і выкарыстанне малярнага скотчу выклікала асаблівую цікавасць.
Усе ўдзельнікі творчай майстэрні па завяршэнні сустрэчы сумесна стварылі карціны, ужываючы нетрадыцыйныя тэхнікі выяўленчага мастацтва. І мы спадзяемся, што вучэбныя і факультатыўныя заняткі па выяўленчым мастацтве ва ўстановах адукацыі Дзяржынскага раёна набудуць новыя сучасныя метады і прыёмы для творчага развіцця навучэнцаў.
І.І. Асадчая, кіраўнік рэсурснага цэнтра гімназіі г. Дзяржынска «Школа выхавання праз мастацтва»
